სამოქალაქო საზოგადოების განვითარების ცენტრი (CSDC) 2010 წლის 4
თებერვალს დააფუძნა ახალგაზრდა ქალების ჯგუფმა, რომელთაც
საქართველოში მოწყვლადი ქალებისა და ბავშვების მხარდაჭერა სურდათ.
ორგანიზაციის ხელმძღვანელად ნინო თოდუა აირჩიეს. 16 წლის განმავლობაში
CSDC ქუჩაში მცხოვრები და მომუშავე ბავშვების, სკოლის მიღმა დარჩენილი
ახალგაზრდების, მარტოხელა დედებისა და კრიზისში მყოფი ქალების გვერდით
დგას.
650
მოწყვლადი ბავშვი (2017–2026)
5 000+
მოზარდი ჰიგიენის პროგრამაში
320-მდე
გადამზადებული სოციალური მუშაკი
145
მარტოხელა, მრავალშვილიანი და მიუსაფარი ქალი
როგორ დაიწყო
2000-იანი წლების სოციალურ-ეკონომიკურმა ცვლილებებმა განსაკუთრებით
დაამძიმა ქუჩაში მცხოვრები და მომუშავე ბავშვებისა და მათი ოჯახების
მდგომარეობა. ამ ბავშვების უმეტესობა რეგიონებიდან ან კონფლიქტური
ზონებიდან უკეთესი ცხოვრების საძიებლად თბილისში ჩამოვიდა, თუმცა აქ
მუდმივი თავშესაფრის გარეშე აღმოჩნდა. ყველაზე მოწყვლადები იყვნენ
მარტოხელა დედები, დევნილები და მრავალშვილიანი ოჯახები.
2010 წელს, ესტონეთის საელჩოს მხარდაჭერით, რეგიონებში ჩატარებულმა
გამოკითხვამ აჩვენა, რომ გამოკითხულ ქალთა 53% მეუღლის მხრიდან
ძალადობას განიცდიდა, რისი ერთ-ერთი მთავარი მიზეზიც ქალების
ეკონომიკური დამოკიდებულება იყო. დამფუძნებლებმა გადაწყვიტეს,
ქალებისა და ბავშვების მდგომარეობა ადვოკატირებით, საზოგადოებაში
ინტეგრაციით, საგანმანათლებლო და მხარდამჭერი სერვისებით
გაეუმჯობესებინათ. ახლად შექმნილ ორგანიზაციას ტექნიკური აღჭურვილობა
საერთაშორისო კვლევისა და გაცვლების საბჭომ (IREX) გადასცა.
ჩვენი გზა: 2010–2026
2010
ორგანიზაციის დაფუძნება
CSDC დარეგისტრირდა 4 თებერვალს. IREX-ის მხარდაჭერით ორგანიზაციამ
საოფისე აღჭურვილობა მიიღო, ესტონეთის საელჩოს მხარდაჭერით კი
რეგიონებში ქალთა მიმართ ძალადობის გამოკითხვა ჩატარდა.
2012–2013
პირველი პროგრამები ქუჩის ბავშვებისთვის
„გოგონათა გაძლიერება“ (ქალთა ფონდი საქართველოში) — ქუჩაში მცხოვრები
და მომუშავე 20 გოგონა ჩაერთო არაფორმალური განათლების პროგრამაში.
„ერთად უკეთესი მომავლისკენ“ (მსოფლიო ბანკი) — 30 ბავშვმა გაიარა
სოციალური ადაპტაციის, ბავშვთა უფლებებისა და კომპიუტერული უნარების
ტრენინგები.
2013–2014
„მეც მოქალაქე ვარ“
G-PAC-ის მხარდაჭერით ჩატარდა კვლევა ქუჩის ბავშვების უფლებრივ
მდგომარეობაზე, შემუშავდა რეკომენდაციები სახელმწიფო უწყებებისთვის და
განხორციელდა ადვოკატირების კამპანია დოკუმენტების გარეშე დარჩენილი
ბავშვებისთვის მოქალაქეობის მინიჭების გასამარტივებლად. ბავშვების
ფოტონამუშევრები მეტროსადგურ „თავისუფლების მოედანზე“
გამოიფინა.
2014
ახალგაზრდები და მშვიდობის მშენებლობა
ფონდ „ღია საზოგადოება — საქართველოს“ მხარდაჭერით ახალგაზრდები
კახეთში, შიდა ქართლსა და სამეგრელოში სამოქალაქო საქმიანობისთვის
მოვამზადეთ, ოკუპირებული რეგიონის მოსწავლეებთან კი საინფორმაციო
ტექნოლოგიები დავნერგეთ — შეიქმნა ბლოგი ict4peace.ge.
2014–2015
„უხილავი ბავშვები“ და სამოქალაქო აქტივიზმი
აშშ-ის საელჩოს მხარდაჭერით გადავიღეთ დოკუმენტური ფილმი „ჩემი
ცხოვრების დღიურები“, რადიო „შოკოლადის“ ეთერში მოვამზადეთ 24
ვიდეო/რადიო გადაცემა, ფილმის ჩვენებები 4 ქალაქში გაიმართა და 5 000
ბროშურა გავრცელდა. NED-ის მხარდაჭერით შიდა ქართლსა და სამეგრელოში
135 ახალგაზრდა გადამზადდა.
2015
ტრანზიტული საგანმანათლებლო პროგრამის დასაწყისი
განათლების სამინისტროს პროგრამა „განათლების მიღების მეორე
შესაძლებლობა“ — ბავშვზე ზრუნვის ცენტრების აღსაზრდელებისთვის დაიწყო
მეცადინეობები სასიცოცხლო უნარებსა და სასკოლო საგნებში, 50 პედაგოგი
გადამზადდა. ეს პროგრამა დღესაც გრძელდება.
2016
ერუდიციის კურსი
სპორტისა და ახალგაზრდობის საქმეთა სამინისტროს დაკვეთით 5 საოჯახო
ტიპის სახლის 64 აღსაზრდელს თბილისში, მცხეთასა და გორში ჩავუტარეთ
შემეცნებითი კურსი.
2017–2018
სოციალური მუშაკების გადამზადება და ოჯახების გაძლიერება
ტრეფიკინგის მსხვერპლთა დახმარების სახელმწიფო ფონდისა და USAID-ის
მხარდაჭერით საქართველოს მასშტაბით 320-მდე სოციალური მუშაკი
გადავამზადეთ ქუჩის ბავშვებთან მუშაობისთვის. ევროკავშირისა და
ავსტრიის განვითარების თანამშრომლობის დაფინანსებით მცხეთა-მთიანეთში
მოწყვლადი ოჯახების გაძლიერების პროექტი განვახორციელეთ.
2019
გოგონების ხმა მშვიდობის მშენებლობაში
ქალთა გლობალური ფონდის მხარდაჭერით პროექტი გოგონების როლის
გაძლიერებას მიეძღვნა მშვიდობის მშენებლობასა და კონფლიქტების
მოგვარებაში.
2020–2021
კამპანია „ჩაერთე და ჩართე“
COVID-19 პანდემიის დროს 100-ზე მეტ მარტოხელა და მრავალშვილიან
დედასა და მათ ოჯახებს დავეხმარეთ. ქართველ-ჩეხურმა გუნდმა 24
ვიდეო-ისტორია მოამზადა, კამპანიაში 50 მოქალაქე და ორგანიზაცია
ჩაერთო და 12 000 ლარამდე შეგროვდა.
2022
„ჰიგიენის მცველები“
UNICEF-ისა და USAID-ის მხარდაჭერით 5 000-ზე მეტი მოზარდი ჩაერთო
ჰიგიენისა და COVID-19-ის პრევენციის პროგრამაში; რეგიონებში მობილური
ჰიგიენის ჰაბი მოგზაურობდა.
2023–2025
უკრაინელი ქალების მხარდაჭერა
ქალთა გლობალური ფონდის მხარდაჭერით საქართველოში მცხოვრებ ლტოლვილ
უკრაინელ ქალებს ფსიქოლოგების, იურისტებისა და კარიერის
კონსულტანტების დახმარება შევთავაზეთ, მოვამზადეთ ვიდეოტრენინგები და
ვიდეოინტერვიუები.
2024
განვითარების სტრატეგია 2024–2026
ორგანიზაციამ მიიღო განვითარების სტრატეგია, რომელიც CSDC-ის
ორგანიზაციული და პროგრამული გაძლიერების მიზნებს განსაზღვრავს.
2025
ქალებისა და სტუდენტების გაძლიერება
პროფესიული უნარების სააგენტოს მხარდაჭერით, პირველ სამედიცინო
სასწავლებელთან ერთად, სტუდენტებისა და მოწყვლადი ჯგუფის ქალების
ცნობიერება ავამაღლეთ სამოქალაქო უფლებებისა და ჯანდაცვის
საკითხებში.
2026–2027
ტრანზიტული პროგრამის ახალი ეტაპი
განათლების, მეცნიერებისა და ახალგაზრდობის სამინისტროს დაკვეთით
პროგრამა თბილისში, ქუთაისსა და რუსთავში გრძელდება — მიუსაფარი
ბავშვების განათლებისთვის, სკოლაში ინტეგრაციისა და პროფესიული
ორიენტაციისთვის.
რა შევქმენით
ჩვენი გამოცდილება რესურსებად ვაქციეთ, რომლებითაც დღეს სხვა
ორგანიზაციები, პედაგოგები და სოციალური მუშაკებიც სარგებლობენ:
დოკუმენტური ფილმები
„ჩემი ცხოვრების დღიურები“ და „ეს არ არის ჩემი სახლი“ — ქუჩაში
მცხოვრები და მომუშავე ბავშვების ცხოვრებაზე.
„უხილავი ბავშვები“
23-ნაწილიანი სატელევიზიო და რადიო ციკლი ბავშვზე ზრუნვის, ინკლუზიური
განათლების, ძალადობისა და რეინტეგრაციის თემებზე.
კვლევები და სახელმძღვანელოები
„ოჯახების გაძლიერება მცხეთა-მთიანეთის რეგიონში“, „სოციალური მუშაობა
მიუსაფარ ბავშვებთან“, „სასიცოცხლო უნარ-ჩვევების განვითარება
ბავშვებსა და მოზარდებში“.
ბროშურები და კამპანიები
„როგორ დავიცვათ ბავშვი ძალადობისგან“, „ყველა ბავშვი სკოლაში“,
„გენდერი და ქალთა უფლებები“ და საინფორმაციო პოსტერები.
დღეს და მომავალში
დღეს CSDC-ის მულტიდისციპლინურ გუნდში სოციალური მუშაკები,
ფსიქოლოგები, სპეციალური მასწავლებლები და ტრენერები მუშაობენ. 2033
წლისთვის ვისწრაფვით, ვიყოთ წევრობაზე დაფუძნებული, საზოგადოების
მაღალი ნდობით აღჭურვილი ორგანიზაცია, რომელსაც თბილისსა და ბათუმში
ქალებისა და ბავშვების სერვისცენტრები ექნება.
